eVejledning nunatsinni suliniut nutaaq- amerlanerit ilinniagaqarnissaannut aqqutissiuussissaaq.

eVejledning nunatsinni suliniut nutaaq innuttaasut amerlanerit ilinniagaqarnissamut aqqutissiuunneqarnissaannik ilinniakkamillu aallaqqaammut eqqortumik toqqaanissaannik qulakkeerissaaq.

Nunatsinni ilinniagaqarnissamut periarfissat annertusiartorput. Ilinniagaqarniartullu amerlillutik. Ineriartorneq taamaattoq pitsaalluinnartuuvoq. Periarfissarpassuilli ilinnialerniat toqqaaniarnerannut ajornakusuulersitsisinnaapputtaaq, isumaliutersuutillu taamatullu apeqqutit amerlilluinnarsinnaallutik. Ilinniarnera universitetimi nangeqqissavara? Ilinniagassatut takorluukkannut iserniaraanni piumasaqaatit suuppat? Ilinniakkamik inuussutissarsiummut sammititamik toqqaassaguma ilinniarfissarsisinnaassaanga? Ilinniarnerma ingerlanerani nunanut allanut aallarlunga pikkorissarsinnaavunga? Apeqqutit taakku tamarmik eVejledning- Nuna Tamakkerlugu Ilitsersuisarfimmi sakkuusivimmi sakkut nutaanersaat- aqqutigalugu akiniarneqarsinnaanngorput. Sakkussaq amerlanerit ilinniagaqalernisaannut aqqutissiuussisussaq amerlaneroqisut aallaqqaammut ilinniakkamik eqqortumik toqqaasinnaanngornissaannik qulakkeerisussaq.

Nunatta isorartussusaa nunasseriaaserlu nutaaliornissamik piumasaqaatitaqarput.

Nunatsinni ilinniartitaaneq kalaallit inuusuttut ilinniakkaminnik naammassinnittut amerlinerat ilutigalugu assigiinngitsorpassuartigut pitsaasumik ineriartorpoq. Nunattali isorartussusaa nunasseriaaserlu ilinniartitaanermut tunngasunut sunniuteqarpoq, nutaamik eqqarsarluni nutaaliornikkullu pitsaasumik ineriartorneq ingerlaannarsinnaaqqullugu inerisaajuarnissamik piumasaqaatitaqarluni. Inuit ilinniarnerminni tunaartassaminnik toqqaanialersussat, inuunermi toqqagassat annertuut ilaannik toqqaasussanngorput. Toqqagaq taanna inuunerup sinnerani aalajangiisuujumaarsinnaavoq, taamaammallu ilinniartut inuillu suliffeqanngitsut pitsaanerpaamik toqqammavissaqarlutik taama annertutigisumik toqqaasinnaanissaannut paasisimannilluartumik piumasaqaatinillu qaffasissunik eqquutitsisumik qarasaasiakkut aqqutissiuunneqarneqarsinnaanerat, maanna Nuna Tamakkerlugu Ilitsersuisarfimmit nutaaliorluni aqqutissiuussisarnikkut atuutilersinneqarpoq.

– Illoqarfinni tamani Majoriaqarnera (nunatsinni illoqarfiit 17-iupput, taakkunanilu tamani suliffissarsiuussisarfinnik-, aqqutissiuussisarfinnik- piginnaasanillu annertusaavinnik Majoriaqarpoq, aaqq.) inoqarfiilli 50-it sinneqarnerat isumassarsiap pinngorneranut patsisaavoq. Innuttaasutut takkulluni aqqutissiuunneqartarneq ileqquusimavoq -sulilu taamaalluni. eVejledning tamatumunnga taarsiullugu ilinniartitaanermut, innuttaasut qarasaasiakkut toqqaannartumik uatsinnut saaffiginnissinnaanerisigut, aqqutissiuussinerup pitsaassutsikkut qaffanneqarsinnaaneranik periarfissiivoq. Aqqutissiuussisarneq allanngortissanngilarput, immikkoortulli tamaasa ikiorsiiviginiarlugit pioreersumut ilassuteqassaagut. eVejledningi inuusuttunut inersimasunullu aqqutissiuussassanut tunngaannarani, aqqutsissiuussisunut sakkussaavortaaq. Taakku kisimiikkajupput saaffiginnissutillu tamaasa akissuteqarfigisussaasarlugit. Tamannalu ajornakusoorsinnaavoq, Christine Tønnesen, Nuna Tamakkerlugi Ilitsersuisarfiup pisortaa oqarpoq imalu nangilluni:
– Ajoraluartumik ilinnialerniat amerlasuut piffissaq kingullerpaaq atorlugu – immaqa qinnuteqarfissaq kingulleq aqaguttoq aalajangiisarnerat misigisarparput. Aqqutaani qinnuteqarfissaq kingulleq nallertinnagu ilisimasaqalersillugit aalajangiisinnaassuseqalersillugillu aqqutissiuunneqarniartussaapput paasissutissinneqartussaallutillu.

Innuttaasunik aliasuutilinnik inunnillu allanik naapitsinissamut annilaanngatilinnik ataatsimut aqqutissiuussineq

Nunatsinni ilinniartitsineq ilikkagaqartitsinissamullu periutsit inerisarniarneqartuarput. Ilinniartut tamarmik – piginnaasatik, pisariaqartitatik soqutigisatillu aallaavigalugit– siunissartik pillugu toqqaanissamut anguniakkaminnillu malersuinissamut sanngisuunngortinnissaat piginnaaneqalersinnissaallu, ilinniartut angusaasa ilinniartitaanikkullu ingerlariaqqiffiit qulakkiissavaat. Taamaammat aamma innuttaasut tamarmik ilinniakkamik inuussutissarsiummillu toqqaanissamut aqqutissiuussinermik siunnerfilimmik piukkunnartumillu akeqanngitsumik neqeroorfigineqarnissaat inatsisitigut pisussaaffiuvoq. Aqqutissiuussineq ilinniakkamik taamaatitsiinnartarnermik allamillu toqqaasarnermik sapinngisamik killilersimaartitseqataassaaq, ilinniartullu ataasiakkaat ilinniakkamik toqqakkamik- ilinniakkatigut inuttullu sapinngisamik annertunerpaamik pissarsiviusussamik- naammassinnisinnaalersitseqataassaaq. Aqqutissiuussinermut akisussaaffik pingaarneq Nuna Tamakkerlugu Ilitsersuisarfimmiippoq tamatumalu Majoriami, ilinniarfinni meeqqallu atuarfianni aqqutissiuussisut piukkunnartumik aqqutissiuussisinnaanissaat qulakkiissavaa. Tamatuma saniatigut Nuna Tamakkerlugu Ilitsersuisarfik, nuna tamakkerlugu ilinniarfinni ilinniartunut innuttaasunullu Majoriamiittunut, tarnikkut inuttullu atukkatigut siunnersorneqarnissamik katsorsarneqarnissamillu neqeruussaaq.

– Nuna Tamakkerlugu Ilitsersuisarfimmi assigiinngitsunik ukkassaqarpugut, innuttaasunut attavigisatsinnut aallaqqaammut ilinniakkamik eqqortumik toqqaanissaannut ikiuussinnaavugut. Ilinniakaminnik taamatitsiinnartartut ikilisinnissaannik ilinniakkaminnillu naammassinnittut amerlinissaannik qulakeereqataavugut. eVejledningili aqqutigalugu allarluinnarmik qulakkeerivuguttaaq. Inuimmi aliasuuteqartut, inoqatiminnik naapitsinissamut annilaangasut imal. allanik ajornartorsiuteqartut qarasaasiakkut ikiorserneqarsinnaanissaat qulakkeerparput. Taakkuupput aqqutissiuunneqarnissamut nammineerlutik ornigunnissaminnut sapiuttut. Taamaaliornikkut inuusuttut nipituumik oqarnissaminnut qunusut pissarsiarisinnaavagut. Taakku ataatsimoortillugit kiffartuunneqarsinnaasimanngillat maannali tamanna periarfissaalerpoq.

Aqqutissiuussisarneq muminneqassaaq

Nunatsinni aqqutissiuussisarnerup tunaartaqarluni ingerlaarnermiit- ilinniartitaanermut pilersaarutit takutissinnaasartagaanniit- periarfissamut paasilertoruminaannerusumut, iliuuseqarnermut annikitsumut angusanik annertuunik pilersitsisinnaasartumut piartornissaanik Nuna Tamakkerlugu Ilitsersuisarfiup kissaateqarnera, Christine Tønnesenip oqaloqatiginerani erserpoq. Ilinnialerniat imminnut inuunertillu naallugu ilinniarnissaminnut akisussaassuseqarsinnaanissaannut eqqortunik sakkussinneqassaapput. Iluatsissappallu naggataagut ilinnialerniat pitsaanerusunik piginnaasaqalernissaannik, inuiaqatigiinnulli aamma angusap annertunerulerneranik kinguneqassammat, siusissukkut iliuuseqartoqassaaq.

– Meeqqat atuarfianni inuusuttut aqqutissiuunneqangaartanngillat. Aqqutaanili tamanna annertusiartortinneqartarluni, uagulli ingerlatsinerup muminneqarnissaa kissaatigaarput. Inuusuttut siusinnerusukkut paasissutissinneqassaapput. Ilinniarneqarsinnaasut pillugit paasissutissanik siunissamilu sunngorsinnaaneq pillugu paasissutissanik tuniorarneqassaapput. Tunngaviusumik isummanik allannguinissaq pineqarpoq. Oqaloqateqartuarnissaannik ilinniartikkusuppagut. Ilinniarnerminnik siusissukkut unititsiinnartartut naammattoortakkavut amerlavallaarput. Ilinniakkamik aallartitsiniat qinnuteqaasiornissaannut eVejledning aqqutigalugu ikiorsinnaassanngilagut, ikiorluarneqarunilli tamatuma Majoriami oqaloqatigiissutiginissaa ajornannginnerulersinnaasariaqarpoq. Kimit ikiorneqarsinnaaneq inersimasut amerlasuut nalornissutigisarpaat. Majoriaq inuusuttuinnarnut tunngasuusorisarpaat. Majoriami aqqutissiuussisarneq ukioqatigiiaanut tamanut atuuppoq.

eVejledning nutaaq atorlugu aqqutissiuussisinnaaneq akuutinneqarlualereerpoq aqqutissiuunneqarnianerillu atorluarneqarluni. Isummersuutit pitsaasut amerlapput aaqqisuussinermillu tamatuminnga atuinissaq soqutigineqarluarluni:

– Suliniummut nutaamut tamatumunnga isummersuutinik pitsaasunik pissarsivugut, sullissassallu assigiinngitsut ikiorsinnaanissaat amerlaneroqisullu aqqutissiuussinermik pitsaasumik ikiorsinnaanissaat upperilluinnarpara. Pitsaasunik nukissaqaqigatta eVejledning periarfissatut annertuutut isigaara. Annertuunik angusaqarusuppugut, Christine Tønnesen naggasiivoq.