Ukiumoortumik nalunaarusiaq 2020

2020 ukioq imaannaanngeqisoq naavoq! Qujanaq ukiumut ilinniarfiulluartumut!

Ukioq ajunngilluinnartumik pissanganartorpassuarnik sammisassaqarfiussalluni aallartippoq. Ilitsersuisarfimmi sulisut aaqqisuussinernik pissanganartunik, atorfimmut atatillugu angalanernik, pikkorissaanernik, nunanut allanut isumassarsiorluni angalanissanik pilersaaruteqarput- allattukkallu amerlaqaat. Ilitsersuisarfik marsip ulluisa arfernanniit qulaaluaannut Kangerlussuarmi ataatsimiisitsivoq, tassani suliniutissatut siunnersuutit, anguniagassatut siunniussat saqqummiussallu pissanganartut allat eqqartorpagut, ualikkullu nunanneqisumik sikumi qimusserneq angumeraluguttaaq. Tamatuma nalaani corona nunarsuarmi akornusersuilereerpoq, Nuummeersulli Kangerlussuarmiit qangattareermata nal. ak. affaata qaangiunnerani Norsaq coronamik tunillatsissimagunartunik ilaasoqarluni mimmat nunarput taamanili ileqqumisut ileqqinngilaq.

Coronap sivikitsuinnarmik akornusersuinissaa Ilitsersuisarfimmit neriuutigineqaraluarpoq, ullumikkulli 2021-imi Ilitsersuisarfimmi sammisassanut tamanut suli unammilligassiivoq. Tamanna akuerisariaqarparput taamalu pisoqarfiusumi iliuuseqarsinnaanermut pikkorinnerulerluta. Ilitsersuisarfiup suliassai pingaarnerit tassaapput inuit tikillugit assigiinngitsutigut naapitsineq, taamaammat Ilitsersuisarfik ukioq 2020 naallugu annertuumik unammillerneqarpoq. Teknikki digitaliusoq atorlugu aaqqiissutissat Ilitsersuisarfimmit nukittuffigineqanngillat ullumikkullu teknikki taanna atorlugu aaqqiissutissarsiorneq ilikkariartorparput.
Ukiumoortumik nalunaarusiaq atuarakku qujanaq Nunalu Tamakkerlugu Ilitsersuisarfimmut tikilluarit.

Ukiumoortumik nalunaarusiaq ugguuna aasinnaavat

Pisortaq
Christine Tønnesen