Ilinniartut innuttaasullu ilinniarfiusinnaasunik suliffiusinnaasunillu ilisimasaqalernissaat
siunertaralugu suliniutaasoq Ilinniarfissanik Nittarsaasilluni Angalaneq ukiorpaalunni
suliniutaavoq. Ukiuni arlaqartuni AQQUT ataqatigiissaarisuusarpoq, suliarli piumasarineqartut inatsisillu tunngaviginagit AQQUT-mut inissinneqarnikuulluni.
Taamaattorli piffissap ilaani suliniut AQQUT-mit isumagineqarsimavoq.
Ilinniarfissanik Nittarsaasilluni Angalanerup ingerlannerani tamarmi ataqatigiissaarineq,
pilersaarusiorneq angalanerlu annertuumik sulisut nukiinik pisariaqartitsiffiusarpoq.
AQQUT-ip Qinngornerullu aqqissuusatigut allanngortinnerani nuna tamakkerlugu
aqqutissiuussinermik immikkoortortap isumagisassai pingaarnerit annertunerusumik
ukkatarineqalerput. Allanngortitsinerup kingunerisaanik AQQUT ilinniartunngorusuttunut innuttaasunullu attaveqarunnaarpoq. Qitiusumik ilinniarfiit, inuusuttut ilinniarfii, meeqqat atuarfii Majoriallu attaveqartussaasutut inatsisitigut
aalajangersarneqarpoq.
Nuna tamakkerlugu aqqutissiuussinermik inatsisit naapertorlugit AQQUT-ip
isumagisassaminik taamaallaat ukkassinissaa piumasaqaatigineqarpoq.
Suliassat ilinniartunut toqqaannartumik attuumassuteqarunnaarlutik, aqqutissiuussisunik
piginnaanngorsaanikkut, ataqatigiissaarinikkut tapersiisarnikkullu suliaqarnerup
inerisarnissaa nukittorsarneqarnissaalu aallunneqarnerulissapput.
Tamakku ilutigalugit aaqqissuussinerup allanngortinneqarnerisa kingunerisaanik
AQQUT-mi isumalluutit ilanngarneqarput, taamaattumik angalanerit aqqutissiuussisutut
tunngaviusumik ilinniakkamut (VGU) kiisalu nuna tamakkerlugu aqqutissiuussinermut
tunngasunut pingaarnersiorneqartassapput.
Tunuliaqutaasut tamakku tunngavigalugit Ilinniartitaanermut, Kultureqarnermut,
Timersornermut Ilageeqarnermullu Naalakkersuisoqarfik peqatigalugu AQQUT
aalajangiivoq 2026-mut Ilinniarfissanik Nittarsaasilluni Angalanermik
ataqatigiissaarineq aaqqissuinerlu AQQUT-ip ataaniikkunnaassasoq.
Taarsiullugu suliniummut akisussaaffiup isumaliutigineqaqqinnissaa aamma najukkani
ataasiakkaani Majoriat, qitiusumik ilinniarfiit, ilinniartoqarfiit, kommunit kiisalu
suliffeqarfiit pineqartut akornganni pisussaaffeqarluni suleqatigiilluni
aaqqissuunneqarnissaa inassutigineqarpoq, taamatut iliuuseqarnikkut inatsisitigut
aalajangersakkat malillugit ilinniartunik, ilinniagaqalerusuttunik innuttaasunillu
toqqaannartumik attaveqartartut angujumasat suliamillu aallutaqartut qanillillugit
suliniut inissinneqassaaq.