Moduli nangitsivik

Moduli nangitsivik upernaaq 2027

Upernaaq 2027-mi modul nangitsivimmi toqqarneqarsinnaasut assigiinngitsut sisamaapput. Toqqarneqarnerpaaq ingerlanneqassaaq, atuartitsinerillu online-kkut Teamsikkut qallunaatut kalaallisullu ingerlanneqassapput. Allaaserinninnerit qallunaatut kalaallisulluunniit pisinnaapput.

Pikkorissarnerni nangitsiviusuni siunertaavoq ilinniartoq tunngaviusumik ilinniareernermi kingorna immikkut sammisanut ilinniarnerup inuussutissarsiornerullu tungaannut aqqutissiuussinerit iluanniittunut piginnaasaminik qaffassaanissaa. Sammivinni sisamaasunik toqqarneqarnerpaaq ingerlanneqarumaarpoq.

Saaffigisat tassaapput Tunngaviusumik aqqutissiuussisutut ilinniakkamik (VGU) naammassinnissimasut.

Piffissat:
Modul 1: 12/1 – 14/1 – 2027
Modul 2: 9/3 – 11/3 – 2027
Misilitsinneq: 13/5 – 2027

Qinnuteqarnissamut killigititaq tassaavoq 7. december 2026

Ilinniartitsisut: Lisbeth Højdal aamma Lone Josefsen

Nangitsivimmi immikkoortoq 1 Ikaarsaariarfimmi aqqutissiuussineq

Siunertaq

Immikkoortumi siunertarineqarpoq ilinniartoq ikaarsaariarfimmi aqqutissiuussinermi sammivinnik assigiinngitsunik ilisimasaqalissasoq aammalu nammineq sulinerminik misissuillunilu nalilersuisinnaalissasoq. Siunertaavortaaq ilinniartoq aqqutissiuussinermik suliniuteqarnermi periusissamik ikaarsaariarnermut immikkut tunngassutilimmik inerisaasinnaalissasoq.

Anguniagaq

Ilinniartumut anguniagassatut siunniussat tassaapput ilinniartoq:

ikaarsaariarfimmi aqqutissiuussinerup siunertaanik, aaqqissugaaneranik suleqatigisanillu ilisimasaqalissasoq
ikaarsaariarnermi ajornartorsiutaasinnaasunut teoriinik kiisalu inuusuttut inersimasullu allannguinerminni ajornartorsiutigisinnaasaannik takunnissinnaassasoq
aqqutissiuussinermi periutsinik inuusuttunut inersimasunullu tunngasunik ilisimasaqalissasoq
aqqutissiuusseriaatsini aalajangersimasuni periusissanik ikaarsaariarfinni ajornartorsitinut tunngasunik misissuinerni, oqaasertaliinerni naliliinernilu misilittagaqalissasoq.

Imarisai

Ikaarsaariarfinni aqqutissiuussinerup siunertaa, aaqqissugaanera suleqatigisallu
Ikaarsaariarfinni ajornartorsiutinut teoriit (transitioner) kiisalu tarnikkut, inooqatigiinnikkut kulturikkullu immikkuullarissutsit taakununnga sunniutillit.
Ikaarsaariarfinni aqqutissiuussinermi periutsit pilersaarutillu.
Ikaarsaariarfinni ajornartorsiutaasartut immikkut ittut meeqqat atuarfiannit inuusuttut ilinniarfiinut/Majorissanut ikaarsaarnernut aammalu inuusuttut ilinniarfiinit annertunerusumik ilinniarfinnut/inuussutissarsiutinut ikaarsaarnernut tunngassutillit.

Nangitsivimmi immikkoortoq 2 Naammassinninnissamut aqqutissiuussineq

Siunertaq

Immikkoortumi siunertarineqarpoq ilinniartoq inuusuttut inersimasullu ilinniarnissamut ilikkagaqarnissamullu periarfissaannik ilisimasaqalissasoq, taamaalillunilu atuartut naammassinninnissaminnut periarfissaannik ineriartortitsinermik, aqqissuussinermik aallarnisaanermillu piginnaasaqalissalluni.

Anguniagaq

Ilinniartup anguniagassaatut pilersaarutit tassaapput ilinniartoq:

ilinniarfiit immikkuullarissusaannik, imarisaannik aaqqissugaanerannillu aammalu ilinniarfinni assigiinngitsuni atuagarsornikkut ajornartorsiutaasartunik ilisimasaqalissasoq.
kajumissuseqalersitsinissamut teoriinik aammalu pissutsinik atuartut/ilinniartut ilinniarnerminnik attassiinnarnissaannut tunngassutilinnik ilisimasaqalissasoq
aqqutissiueriaatsinik inerisaanermik aammalu suliniutinik maanaannakkut unittoortarnerup pinaveersaartinneqarnissaanut pilersaarutinik ineriartortitsinernik ilisimasaqalissasoq.

Imarisai

Ilinniartitaanerup iluani ilinniarnissamut inuussutissarsiutinullu aqqutissiuussineq – meeqqat atuarfiinit/Majoriamit inuusuttut ilinniarfiinut ilinniarfinnullu qaffasinnerusunut
Maanaannaq unittoortarnermik ajornartorsiutit – tassunga ilaallutik inuuniarnermut, suiaassutsimut kulturimullu tunngasuni ajornartorsiutit
Piumassuseq maanaannarlu unittoortarnerup pinaveersaartinneqarnera – aqqutissiuussinermi iliuutsit periutsillu
Ingerlaqqinnissamut tunngasut toqqaaniarnermilu piginnaasanik inerisaaneq
Suleqatigiinneq attaveqaatillu

Nangitsivimmi immikkoortoq 3 Inersimasunik aqqutissiuussineq ingerlaqqinnissamullu piareersarneq

Siunertaq

Immikkoortumi siunertarineqarpoq ilinniartoq inersimasut ingerlaqqinnissamut inerisaanerannut toqqaaniarnerannullu tunngassutilinnik immikkuullarissunik ilisimasaqalissasoq aqqutissiuinissamut periusissamik eqqortumik pilersitsinissaq siunertaralugu. Siunertaavortaaq ilinniartoq aqqutissiuussinermi teoriinik periutsinillu assigiinngitsunik inersimasunut tunngasunik ilisimasaqalissasoq.

Anguniagaq

Ilinniartup anguniagassaatut pilersaarutit tassaapput ilinniartoq:

inersimasut ingerlariaqqittarnerannik toqqaasarnerannillu paasinninnissaminut aqqutissiuusseriaatsit teoriivinik takunnissinnaalissasoq
piginnaasanik qaqilerinermi naliliinermilu periutsinik ilisimasaqalissasoq
inuup ingerlaarfigisimasaanik piviusuusaartitanillu suliaqarnermik misilittagaqalissasoq aammalu inersimasut aqqutissiuunneqarnissamik pisariaqartitsinerannik misissuisinnaalissasoq naliliisinnaanngorlunilu

Imarisai

Majorissani inersimasunik aqqutissiuussineq
Inuuneq tamaat ilinniarneq ingerlaqqinnerlu
Inersimasut tarnikkut pissusaat, inuunerisa ingerlarnat inuunermilu aqqusaagaat
Ingerlariaqqinnermut teoriit aammalu piginnaasanik ineriartortitsinissamut piumassuseq
Piginnaasat- misissuineq naliliinerlu
Piginnaasanut piumasaqaatit inuussutissarsiuteqarnerullu ineriartornera.

Nangitsivimmi immikkoortoq 4 Inuusuttut inersimasullu aqqutissiuunneqarnissamik immikkut pisariaqartitsisut

Siunertaq

Immikkoortumi siunertarineqarpoq ilinniartoq inuusuttunut inersimasunullu aqqutissiuunneqarnissamik immikkut pisariaqartitsisunut tunngasunik ilisimasaqalissasoq aammalu aqqutissiuussinermi iliuusissat periutsillu suut aqqutissiuussassanut assigiinngitsunut naleqqunnerinut misissuinermik naliliinermillu ilisimasaqalissasoq.

Anguniagaq

Ilinniartup anguniagassaatut pilersaarutit tassaapput ilinniartoq:

inuusuttunik inersimasunillu aqqutissiuunneqarnissamut immikkut pisariaqartitsisunik paasisimasaqalissasoq aammalu taakkua nassaarinissaannut, nalilersornissaannut oqaluttuarinissaannullu misilittagaqalissasoq
inuusuttunik inersimasunillu aqqutissiuunneqarnissanut immikkut pisariaqartitsisunik aqqutissiuussinermik suliaqarnermi ajornartorsiutinik takunnissinnaanermik naliliisinnaanermillu ilisimasaqalissasoq
aqqutissiuussinermik pisariaqartitsinerit assigiinngitsut ikiorserniarlugit aqqutissiueriaatsinik naleqquttunik misissuinermik, naliliinermik toqqaaniarnermillu misilittagaqalissasoq
suliat akimorlugit attaveqaatini suleqatigiiffinnilu suleqataanissamut piginnaasaqalissasoq

Imarisai

Inuusuttunik inersimasunillu aqqutissiuunneqarnissamik immikkut pisariaqartitsisunik paasinninnissamut tunngatillugu tarnikkut, inooqatigiinnikkut ilinniagaqarnikkullu isiginneriaatsit
Aqqutissiuussinermi teoriit periutsillu inuusuttunut inersimasunullu aqqutissiuunneqarnissamik immikkut pisariaqartitsisunut tunngassusillit
Ilinniarnissamut suliffeqarnissamullu neqeroorutit
Inatsisit malittarisassallu inuusuttunut inersimasunullu aqqutissiuunneqarnissamik immikkut pisariaqartitsisunut tunngasut
Peqataatitsineq, akulerutitsineq naligiissaarinerlu - marginalisering aamma stigmatisering
Suleqatigiinneq attaveqaatillu
Ileqqorissaarnermi oqaloqatigeeriaatsinilu unammilligassat inuusuttunut inersimasunullu immikkut pisariaqartitsisunut aqqutissiuussinermut tunngasut

Nalunaarfissaq

Nalunaarniaruit una tooruk. Modulini sisamani sorleq peqataaffigerusunnerlugu nalunaarfinni allassavat. Kingusinnerpaamik nalunaarfissaq 7. december 2026.