Moduli nangitsivik 2025

Ukioq 2026-mi Modul nangitsivimmi toqqarneqarsinnaasut assigiinngitsut marluupput. Toqqarneqarnerpaaq ingerlanneqassaaq. Qinnuteqarnissamut killigititaq tassaavoq 16. januar 2026.

Sumiiffissaq
Tunngaviusumik Nuummi; qinnuteqartussalli amerlanersaasa suminngaanneernerat apeqqutaassaaq.

Oqaatsit ilinniartitsinermi atorneqartussat
Kalaallisut qallunaatullu. Allaaserinninneq qallunaatut.

Modulimi siunertaavoq inuusuttut inersimasullu aqqutissiuunneqarnissamut immikkut pisariaqartitsisut pillugit ilinniartup ilisimasaqalernissaa, aqqutissiuussinermilu iliuusissatut siunniussat periutsillu suut saaffigisanut assigiinngitsunut naleqquttuunerannik misissueqqissaarnermik naliliinermillu misilittagaqalernissaa.

Modulip imarisai:

• Inuusuttunik inersimasunillu aqqutissiuunneqarnissamut immikkut pisariqartitsisunik paasinninnissamut, tarnip pissusaagut, inuiaqatigiit aaqqisuussaanerisigut qanorlu ilikkartarneq pillugu isumaliutersornikkut periarfissat.
• Aqqutissiuussineq pillugu teoriit periutsillu inuusuttunut inersimasunullu immikkut pisariaqartitsisunut attuumassuteqartut.
• Inuusuttunut inersimasunullu immikkut pisariaqartitsisunut ilinniartitaanermut suliffissaqarnermullu neqeroorutit.
• Inatsisit maleruagassallu inuusuttunik inersimasunillu immikkut pisariaqartitsisunik aqqutissiuussinermut attuumassuteqartut.
• Ataatsimoorneq kinguneqarluartoq, peqataatitsineq pissusissamisoornerlu- ajattuineq isummiuteriikkallu tunngavigalugit pinninneq.
• Suleqatigiinneq attaveqarfiillu.

Ileqqorissaarnermut oqaloqatigeeriaatsimullu tunngatillugu unammilligassat, inuusuttunik inersimasunillu immikkut pisariaqartitsisunik aqqutissiuussinermut attuumassuteqartut.

Piffissaq
17. – 19. februar 2026

Ikaarsaarnissamut aqqutissiuussinermi immikkut ittunik ilinniartup ilisimasaqalernissaa, nammineq periutsiminik misissueqqissaarsinnaanngornissaa naliliisinnaanngornissaalu modulimi siunertaapput. Ilinniartup iliuusissamik aqqutissiuussinermik, ikaarsaarnermi ajornartorsiummut aalajangersimasumut siunnerfilimmik inerisaasinnaanngornissaa siunertaavortaaq.

Modulip imarisai:

• Ikaarsaarnermi aqqutissiuussinermi anguniakkat, aaqqissuussaaneq suleqatigisallu.
• Ikaarsaarnermi ajornartorsiutit pillugit teoriit pissutsillu immikkut ittut tarnip pissusaanut, inuiaqatigiit aaqqissugaanerannut kulturimullu tunngasut taakkununnga sunniuteqartut.
• Ikaarsaarnermi aqqutissiuussinermi periutsit iliuusissatullu siunniussat.

Ikaarsaarnermi ajornartorsiutit immikkut ittut ass. meeqqat atuarfiata  inuusuttunullu ilinniarfiit/Majoriap, inuusuttunut ilinniarfiit qaffasissumillu ilinniartitaanerit aamma /imal. inuussutissarsiutit akornanni ikaarsaarnernut attuumassuteqartut.

Piffissaq
14. – 16. april 2026