1/10-2025 aallarnerfigalugu Qinngorneq Inulerivimmut atalernikuuvoq. Oqaloqateqarnissamik qinnuteqarneq siumoortumik inulerivik.gl aqqutigalugu pissaaq

Neqeroorut nunatsinni meeqqat atuarfiannit qaffasinnerumi ilinniartunut tamanut naatsorsuussaavoq Taanna ass. assassorluni ilinniartunut, ilinniagartuutut ilinniartunut, inuussutissalerinermik ilinniartunut, højskolertunut, il.il. atuuppoq

QINNGORNEQ tarnip pissusaanik immikkut ilisimasalinnik tarnikkullu katsorsaasunik suleqatigiinnik sulisoqarpoq. QINNGORNEQ-mi sulisut tamarmik nipangiussisussaatitaapput. Pisariaqartitsinerit aallarniutaasumik oqaloqatigiinnermi naliliivigineqassaaq, tamatumani suna ilinnut naleqqunnerpaanersoq peqatigiilluta paasiniassavarput.

Ataasiakkaanut oqaloqatiginninnernik neqeroorajunneruvugut pisariaqartinneqarpalli ataatsimoorluni oqaloqatigiinnernik ingerlatsisinnaalluta. Oqaloqatigiinnerit naapilluni qarasaasiakkulluunniit ingerlanneqarsinnaapput.