Aqqutissiuunneqarneq akissutissarsiviunngila?

Aqqutissiuunneqarniaq allanik pisariaqartitsippat suut periarfissaappat?

Aqqutissiuunneqarniat ilaat ilinniartitaaneq pillugu aqqutissiuunneqarnissap saniatigut allatigut ikiorneqarnissaq pisariaqartippaat.

Aqqutissiuunneqarniaq uatsinnit aqqutissiuussisuusunit neqeroorutaasinnaasunit allaasunik pisariaqartitsisinnaasarpoq. Taamaattoqartillugu ikiorsiisarfinnut allanut aqqutissiuunneqarniap ikiorserneqarfigisinnaasaanut innersuussisinnaavutit.

Aqqutissiuunneqarniat ikiorluarneqartutut misigigunik kingornalu ilinniartitaanermut tunngatillugu aqqutissiuunneqarnissaq pisariaqartikkunikku uteqqinnissaat qularnanngilaq.

Ataaniittoq aqqutissiuunneqarniap qanoq innersuunneqarnissaanut tunngasoq atuaruk:

Tarnikkut katsorsaasumik/tarnip pissusaanik immikkut ilisimasalimmik oqaloqateqarneq 

Ilinniartut tarnip pissusaanik immikkut ilisimasalimmik oqaloqateqarnissaminnut pisariaqartitsisut Qinngornermi Aqqummut innersuussinnaavagut. Aallarniutaasumik oqaloqatigiinnissamut qinnuteqarniat uani immersuissapput. Taava tarnip pissusaanik immikkut ilisimasallip Ilinniartunut Siunnersuisarfik neqeroorutigissallugu eqqortuunersoq naliliivigissavaa. Neqeroorut akeqanngilaq.

Ilinniartunik Siunnersuisarfimmi immersugassamut attavik.

Ikiorserneqarnissamut allanik aamma periarfissaqarpoq.

Tusaannga

Tusaannga tassaavoq kinaassuseq isertuullugu oqarasuaatikkut siunnersuisarfik tamanut atuuttoq.

Tusaannga attavigineqarsinnaavoq: 1899-imut SMS-ernikkut imal.  oqarasuaatikkut: 801180-imut sianernikkut.

Allorfik

Allorfik; aanngajaarniutinik aningaasanoornermillu pinngitsuuisinnaajunnaarnermut katsorsartinnissamik neqerooruteqarpoq.

Aqqutissiuunneqarniap kommunimi sulianik ingerlatsisoq saaffigalugu imal. najukkami Allorfimmut toqqaannartumik attaveqarnikkut, Allorfik attavigisinnaavaa.

Inersimasunik katsorsaasartut angalaqatigiit

Inersimasunik katsorsaasartut angalaqatigiit, inersimasut meeraanermi imal. peroriartornermi kinguaassiuutitigut innarligaasimasut kingusissukkut tarnikkut kingunerluuteqartut, tarnikkut katsorsartinnissaannut neqeroorutaapput.

Aqqutissiuunneqarniaq kommunimut saaffiginnissinnaavoq.

Alliaq

Alliaq; innuttaasunut 15-ileereersimasunut kamassaqarnermik makitanermillu ajornartorsiutilinnut neqeroorutaavoq akeqanngitsoq.

Aqqutissiuunneqarniaq Alliamut oqarasuaatikkut 34 50 40 imal. Isumaginninnermut Aqutsisoqarfiup nittartagaani attaveqanissamut immersugassaq una atorlugu saaffiginnissinnaavoq.

Ajoqusersimasunut nakorsiartitsivik

Ajoqusersimasunut nakorsiartitsivik; innuttaasunut tarnikkut pinasuartarialinnik ajornartorsiutilinnut pingaartumik psykosertunut, imigassamik aanngajaarniummillu allamik toqunartunissimasunut kiisalu imminut toqussinnaanermut annertuumik aarlerinaatilinnut naatsorsuussaavoq.

Aqqutissiuunneqarniaq najukkami peqqissaavimmut saaffiginnissinnaavoq.

Mindhelper.dk 

Mindhelper; nittartagaavoq eqqarsartaatsikkut peqqissutsimut tunngatillugu ilisimasanik aallerfissaq. Mindhelper.dk; peeraqarneq pillugu aliasuuteqarnermiit kiserliornermut annilaanganermullu tunngatillugu allaaserisanik akeqanngitsunik, videonik apersuinernillu imalik.

stopchikane.nu

Stopchikane.nu; 18-ileereersimasunut qarasaasiakkut inuit attaveqatigiittarfiisigut kannguttaatsuliorfigineqarsimasunut siunnersuisarfiuvoq.

Siunnersuineq qallunaatut ingerlanneqartarpoq.

Kommunimi ilaqutariinnik katsorsaavik

Ilaqutariinnik sullissivimmi illit ilaquttatillu katsorsartissinnaavusi, siunnersortissinnaavusi anigoruminaatsumillu nalaataqarsimagussi ikiorserneqarsinnaallusi.

Aqqutissiuunneqarniaq kommuniminut saaffiginnissaaq.

MISI

MISI; angajoqqaanut meeqqap ineriartornera, nalerisimaarnera ilikkagaqarnissaalu pillugit siunnersortinnissamik ilitsersorneqarnissamillu pisariaqartitsisunut neqeroorutaavoq.

Aqqutissiuunneqarniaq kommuniminut saaffiginnissinnaavoq.

Meeqqanik sullissisut angalaqatigiit

Meeqqanik sullissisut angalaqatigiit, meeqqat inuusuttullu ukioqanngitsuniit 18-iliinissaq qaammammik ataatsimik sioqqullugu ukiullit kinguaassiuutitigut innarligaasimasut imal. kinguaassiuutitigut imminut ajoquserniartutut pissusilersortut kinguassiuutitigullu kannguttaatsumik pissusilersortut katsorsartinnissaannut neqeroorutaavoq.

Aqqutissiuunneqarniaq kommuniminut saaffiginnissinnaavoq.

MANU – angajoqqaanik piareersaaneq

MANU aappariinnut imal. kisimiittunut meerartaartussanut imal. sisamat inorlugit ukiulinnik meeralinnut – angajoqqaatut piginnaasatigut qaffassaavigineqarnissaq siunertaralugu tapersersorneqarnissamik pisariaqartitsisunut – natsorsuussaavoq.

Aqqutissiuunneqarniaq najukkami peqqinnissaqarfimmut juumuumut/ernisussiornermi assistentimut imal. meeraaqqerisumut saaffiginnissinnaavoq.