Skip to main content
search

Ilaqutariinni peroriartorfinni sumiginnaasoqarsimatillugu

Inuunerup ingerlanerani ajornartorsiuteqalernermut peqqutaasinnaavoq Ilaqutariinni peroriartorfiusuni sumiginnangaasimaneq.

Meeqqap tunngaviusumik toqqissisimanissamik, asaneqarnermik, illersorneqarnissamik sammineqarnissamillu pisariaqartitai naammattumik tunniunneqanngikkaangata sumiginnaaneq pisarpoq.

Ilinniagaqarniarnermi ajornartorsiortitsisinnaavoq, malinnaalluarsinnaagaluarluni ass. tatineqarnernut, misigissutsinut sakkortuunut, isornartorsiutinut aaqqiagiinngissutinullu qisuariartarnerit artorsaatigineqarsinnaapput.

Meeraanerup nalaani misigisat assigiingitsuupput, sumiginnaanerit ilaqutariinni assiigiinngitsuni ersiutaat assigiinneq ajorput, soorlu aamma meeqqat assigiinnginnamik pisunut assigiikkaluanut qisuariaataat assiggiinneq ajorlutik.

Inersimasutut suut malugineqarsinnaappat?

Ataani allassimasut tamarmik sumiginnaanermik tunngaveqartariaqanngillat. Misissuinikkulli takuneqartarpoq, meeraanerup nalaani sumiginnaagaanermik aqqusaagaqarsimagaanni ilaatigut attuumassuteqarsinnaasartut:

  • Imminut minnerutinneq – naammanngitsutut misigisimaneq
  • Inoqatit ajortuliornissaannut sillimaneq
  • Misigissutsinut sakkortuunut tiguarteqqajaaneq (ass. kamanneq, ersiorneq, assigisaallu.)
  • Killissanik malussarsinnaannginneq killiliisinnaannginnerluunniit.
  • Imminut allanullu innimiginninniarnikkut oqimaaqatigiinngitsumik pissuseqarneq.
  • Akisussaaffinnik oqimaaqatigiissaarisinnaassuseqannginneq (tigusivallaartarneq/sumiginnaavallaarnerluunniit)
  • Nikallunganermik, imaarunnermik kiserliornermillu misigisimaneq.
  • Imminut mattunneq

Isumakilliornissamut, annilaanganermut, imminut toqunnissamut eqqarsaateqalernissamut, atoqatigiinnermi ajornartorsiuteqalernissamut atornerluinermillu ajornartorsiuteqalernissamut nakkaqqajaaneq.

Illersuutit

Inuit qajannaatsuupput, isumalluutinillu periarfissaasunik atorluaallaqqissuullutik. Taamaalilluni avatangiisini meeqqap pisariaqartitaasa ilaannik tunniussisoqarsimasinnaavoq. Tamanna illersuutitut sunniuteqarsimasinnaavoq. Ukkuninnganniik pisinnaapput:

  • Aanaakkut/Aataakkut ilaquttalluunniit allat
  • Ilinniartitsisoq perorsaasorluunniit
  • Meeraanerup nalaani piffissaq ajunngitsumik ingerlaviusoq
  • Inuusuttut klubbiat pitsaasumik avatangiisilik, assigisaaluunniit

Immaqa arlaannik ilinnut pitsaasumik sunniutilimmik eqqaasaqarsinnaavutit?

Illit ullumi

Meeraanermi pisimasut ilaanni peeruminaattarput. Massakkut – inersimasutut (immaqa inersimasunngulersutut) imminut eqqarsaatigilaariarit Meeraanermiit suut nassatarinerlugit eqqaamaniarlugit, sorliit kipitittariaqarlugit sorliillu atorlugit ingerlaqqinnissaq pillugu killiffeqartarneq pissusissamisoorluinnarpoq. Inuuneq naallugu ineriartortoqartarpoq, meeraanerliorsimagaluarlunilu inuunerup sinnera tamaat ajortumik inissisimasoqartariaqanngilaq.

Oqaloqateqartarit

Inuit ilaasa inoqatinut qanoq innertik oqaluttuarissallugu ajornakusoortittarpaat. Eqqarsaatinik misigissutsinillu oqaasinngortitsineq iluaqutaasarpoq. Ilaanni aallarniutaalluartarpoq massakkut artorsarnerarluni oqaannarluni. Inuit tatigisatit toqqissisimanartitatit ammaffigisinnaavatit. Aamma inuit apuussiviginissaat tamatigut pisariaqarneq ajorpoq – eqqarsaatit misigissutsillu allaaseriinnarlugit ilaasa naammagisarpaat.

Ilaquttat ikinngutillu immaqa misigissusileriffigineqarnissamut inissaqartitsisinnaanngillat. Taamaammat ilinniarsimasunik ikiortissarsiornissaq pisariaqartarpoq.

Oqimaatsumik peroriartorsimanerit peqqutigalugu ilinniarnerni ajornartorsiuteqaruit, oqaloqatigisarsinnaavatsigut.

srg.dk isumassarsiorfigalugu una allataavoq.