Ilinniartunik autisme-qartunik ADHD-qartunillu immikkullu tapersersorneqanngikkunik ilinniarnertuunngorniarnermi peqataasinnaanngitsunik annertunerusumik periarfissiiniarluni, ukiumi atuarfiusumi 2017-imi misiliineq aallartinneqarpoq. Ilinniartut taakku ilinniagaqassutsikkut piumasaqaatinik ilinniarnertuunngorniarlutik qinnuteqartunut tamanut atuuttunik eqquutsitsissapput. Misiliinerulli nalaani ilinnialersussatut tiguneqarnissaq inatsisitigut pisinnaatitaaffiussanngilaq, taamaammallu pineqartuni taakkunani, immikkut suliniuteqartuniit; ilinniarnertuunngorniarfiit, kommunit, angajoqqaat, qinnuteqartut allallu naapertuuttut suleqatigalugit, ilinnialerniap ilinniarnertuunngorniarsinnaaneranut tamatumaluunniit ilaanik ilinniarsinnaaneranut piareersimassusaanik naliliisussanit innersuunneqarsinnaanissamut, ilinniartut ilinniagaqassutsikkut minnerpaamik piumasaqaataasunik eqquutsitsissallutik (allatulli karakterinut tunngatillugu piumasaqaatit, immikkut akuersissuteqartoqarsinnaaneq misilitsittoqarsinnaanerlu). Innersuussinermut atatillugu ilinniartitaanerit suut ilinnialerniamut naapertuunnersut, immikkut suliniuteqartunit qulaajaavigineqassapput, illuatungeriillu suleqatigalugit tamatuma neqeroorutigisinnaanissaa qulaajaavigineqassalluni. Innersuusereernermi ilinniartunngorsinnaaneq neqeroorutaasinnaanngussaaq. Tassalu aatsaat innersuussinermi ilinniarfik suna ilinniartitaanermik neqeroorsinnaassanersoq paasineqassaaq, taamaammallu ilinnialerniaq ilinniartutut tiguneqarnissamut piumasaqaateqarsinnaananilu ilinniarfimmi aalajangersimasumi atualernissaq piumasaqaatigisinnaanngilaa. Ilinniartunngornialli immaqalu angajoqqaat/ akisussaatitaasut, sumi atuarlernissamik kissaataat sapinngissaq tamaat anguniarneqassaaq. Matumani ilinniartunngorniani timikkut inuttulluunniit atukkatigut immikkorluinnaq ittunik pisariaqartitsisoqarsinnaammat, ilinniarnertuunngorniarfiup kollegiami inissamik, pineqartup pisariaqartitsineranut naapertuuttumik tunniussisinnaanissaa qularnaarneqarsinnaanngilaq. Pisariaqartinneqarpat amerlanerpaani inissamik, kiisalu isumaginninnikkut ilinniagalinnit tapersersorteqarnissamut, kommuni ikiuuttussaassaaq.

GUX-it tamarmik ilinniartitaanernik immikkut aaqqissuussanik neqerooruteqarput, qinnuteqartulli ikippallaarpata imal. immikkut suliniuteqartuniit innersuussutit atuarnerup ilinniarfimmi allami neqeroorutaanissaanik tikkuussippata, taakku neqeroorutigisinnaanissaannut qulakkeerisinnaanatik. Ilinniartunngortussatut tiguneqarnermi tunngavilersuuteqarsimanngikkunik, qinnuteqartut tamarmik tunngaviusumik kommunimi najukkaminni ilinniarnertuunngorniarfimmut qinnuteqassapput.