Skip to main content
search

Qarasaasiakkut ikorfartoqatigiinnikkut/supervision ilinniartinneqarnikkullu ilinniartunut attaveqarnerit nukittorsaruk

Nunarput tamakkerlugu ilinniartitsisunut aqqutissiuussisunullu

Piffissaqarfimmi/kajumiffimmi ikorfartoqatigiinneq sunaana?

Piffissaqarfimmi/kajumiffimmi ikorfartoqatigiinneq tassaavoq Ilinniartunut Siunnersuisarfimmiit qarasaasiakkut neqeroorut, pisariitsumik akeqanngitsumillu ilinniagaqassutsikkut ineriartorninnik sukkatitsisussaq. Taanna immikkut ilinniarfinni meeqqat atuarfiannit qaffasinnerusuni ilinniartitsisunut aqqutissiuussisunullu neqeroorutaavoq, suleqatit qanittumeersut ungasissumeersullu peqatigalugit, ulluinnarni sulinermi naapittakkat unammillernartut pillugit siunersioqatigiissinnaallusilu siunnersortissinnaaffissi.

Ikorfartoqatigiinnermi tarnip pissusaanik immikkut ilisimasallit/tarnikkut katsorsaasut marluk Ilinniartunut Siunnersuisarfimmeersut, ilinniartut ajornartorsiutigisartagaannik misilittagartuut aqutsisuussapput.

Taakku pinerit tamaasa ilinniartut sanngiiffeqartut ilinniarneranni tapersersuinissamut ilinniakkaminnillu ingerlatsiinnarnissaannut sakkussaqarnerulersitsisunik saqqummiussisassapput. Saqqummiussinerni ataasiakkaani sammisassat piffissaqarfimmi/kajumiffimmi ikorfartoqatigiinnissanut ulluliussat nalaanni takusinnaavatit.

Peqataaniarluni nalunaaqqaartariaqanngilaq piareersartoqartariaqaranilu.

Ikorfartoqatigiinneq sunaana?

Ikorfartoqatigiinneq ilinniartunik sullissinermi ilisimasaqarnerulernissamut, sakkussaqarnerulernissamut ilinniagaqassutsikkullu ineriartortuarnissamut tunngassuteqarpoq. Taanna tassaavoq periarfissaq ilinniartitsisut aqqutsissiuussisullu sulianik oqimaatsunik unammilligassanillu ajornakusoortunik ulluinnarni sulinerminni naapittagaannik, eqqartuiffissaq.

Ikorfartoqatigiinnermi ilinniartunik aqqutissiuussinissanni aamma/imal. ilinniartitsinissanni ilinniartunut attaveqarnerit unammilligassanullu siumukkannut qanoq iliuuseqarsinnaanerit ukkanneqassapput.

Ilinniartup ilinniarnermini angusaqarluarsinnaanissaanut sulininni ikiorneqarsinnaanissat ikorfartoqatigiinnermi siunertaavoq.

Ikorfartoqatigiinneq makkununnga tunngassuteqarsinnaavoq:

  • Qanoq ilillutit ilinniartup kajumissusaa annertusarsinnaaviuk.
  • Imminut artorsippallaarnak ilinniartumik ilungersortumik qanoq oqaloqateqarsinnaanerit, oqaloqatigiinnissamullu sakkussinneqarlutit.
  • Qanoq ilillutit ilinniartup tarnikkut artorsaateqaraluarluni/unammilligassaqaraluarluni ilinniakkaminik ingerlatsiinnarsinnaanissaanut tapersersuisinnaanerit.
  • Qanoq pisoqarnerani ass. tarnip pissusaanik immikkut ilisimasalimmit imal. napparsimmavimmit immikkut ikiortissarsiortoqartariaqarnissaa.
Ikorfartoqatigiinneq makkununnga tunngassuteqanngilaq:

  • Illit nammineq inuttut ajornartorsiutinnut.
  • Suliffimmi suleqatigiinnikkut ajornartorsiutinut.
  • Aqqutissiuussinermut tunngatillugu apeqqutinut ass. ilinnialernissamut piumasaqaatinut.
  • Apeqqutinut ilinniartitsisuunermut tunngasunut ass. ilinniartitsisutut sulinermi piumasaqaatinut.

Piffissaqarfimmi/kajumiffimmi ikorfartoqatigiinneq qanoq ingerlanneqartarpa?

Ikorfartoqatigiinneq qaammammut ataasiarluni qaammammi pingasunngornermi kingulliup tulliani nal. 14-15.30 (unillatsiarneq ilanngullugu). Peqataasinnaasut qulinut killeqarput. Peqataaniat siulliit qulit ilannguppata, tassalu ataatsimiittussat naammalerpata ikorfartoqatigiinnissamut attaviup periarfissaajunnaarnissaa tunngavigalugu ingerlanneqartassaaq.

Piffissaqarfimmi/kajumiffimmi ikorfartoqatigiinneq neqeroorutaavoq piumasaqaatitaqanngitsoq taamaammallu ilinniartitsisut aqqutissiuussisullu pisariaqartitsineq naapertorlugu neqeroorummik atuisinnaapput; assersuutigalugulu sivisuumik peqataanissamut piumasaqaatitaqanngitsumik ataasiaannarluni peqataasoqarsinnaalluni.

Ikorfartoqatigiinnerni tamani peqataasut sammisassatut toqqagaannit/unammilligassaannit marluk pingasulluunniit toqqarneqassapput. Tarnip pissusaanik immikkut ilisimasallit/tarnikkut katsorsaasut oqaloqatigiinnermik aqutsisuussapput peqataasullu allat naapertuuppat akuliutsitsinneqartassallutik. Peqataasut tamarmik nipangiussisussaatitaapput. “Naalaarneq, apersuineq isumaliuutersuutiginninnerlu nikittaallugit aaqqisuussamik oqaloqatigiinneq” periuserissavarput. Periuseq ikorfartoqatigiinnerit aallarnernerini tamani nassuiarneqartassammat ilisimareertariaqanngilat. Eqqarsaatigeriigassat tassatuaavoq ilinniartunik sullissininni suut ilinnut unammillernartuunerat.

Qarasaasiakkut ikorfartortinnissamut/supervision periarfissaq:
Attavik una toorlugu nalunaaqqaarani ikorfartoqatigiinnissamut peqataasoqarsinnaavoq: